बाढी पहिरोबाट मृत्यु भएकाको शव परीक्षण नगरी दाहसंस्कार गरिने



पाँचथर, ४ कात्तिक

पाँचथरमा बाढी तथा पहिरोमा परी मृत्यु भएकाहरुको शव परीक्षण नगरी दाहसंस्कार गरिने भएको छ ।

आज बसेको जिल्ला विपत ब्यवस्थापन समितिको बैठकले शव परीक्षण गरी दाहसंस्कार गर्न सक्ने अवस्था नहरेको देखिएकाले सो निर्णय गरेको हो । यद्यपि दाहसंस्कारका लागि ‘शंकास्पद स्थितिमा मृत्यु भएको देखिन नआई विपत् प्रकोप (बाढी पहिरो)कै कारण मृतकको मृत्यु भएको स्पष्ट यकिन भएको’ मुचुल्का भने तयार पार्नुपर्ने बैठकले निर्णय गरेको छ ।

सम्बन्धित वडाको वडाध्यक्षको रोहबरमा स्थानीयवासीलाई साक्षी राखी प्रकोपकै कारण मृत्यु भएको मुचुल्का गरी दाहसंस्कार गर्न दिने निर्णय भएको प्रमुख जिल्ला अधिकारी पुण्यप्रसाद ढकालले जानकारी दिनुभयो ।

बाढी र पहिरोका कारण हालसम्म जिल्लामा २६ जनाको मृत्यु भएको पुष्टि भएको छ । गाउँमा मृत्यु भएकाहरुलाई बजारी क्षेत्रमा पु¥याई शव परीक्षण गर्न सकिने अवस्था नरहेको तथा चिकित्सकलाई गाउँमा लगेर शव परीक्षण गर्न सक्ने स्थिति नरहेकाले सो निर्णय गरिएको प्रजिअ ढकालले वताउनुभयो ।

बैठकले जिल्लामा विपतको स्थितिबारे थप सचेत र सजग भई उद्धार र राहतका कार्यलाई तीब्र र ब्यवस्थित गर्नुपर्ने आवश्यकता देखिएको भन्दै सो प्रकारको तयारी गर्ने निर्णय समेत गरेको छ । बाढी तथा पहिरोका कारण पाँचथरमा हालसम्म २६ जनाको मृत्यु भएको छ भने छ जना वेपत्ता छन् । यस्तै आठ जना घाइते भएका छन् ।

प्रतिक्रिया दिनुहोस्