बालिका मृत्यु प्रकरणः प्रशासन र परिवारवीच चार बुँदे सहमति



फिदिम, २१ जेठ

उपचारका क्रममा बालिकाको मृत्यु भएपछि तनाबग्रस्त बनेको पाँचथर अस्पतालको समस्या समाधानका लागि चार बुँदे सहमति भएको छ । आज जिल्ला प्रशासन कार्यालयमा भएको सर्वपक्षीय छलफलबाट प्रशासन र मृतक बालिकाका परिवारवीच चार बुँदे सहमति भएको हो ।

जसअनुसार घटनाको छानविन गरी १५ दिनभित्र प्रतिवेदन पेश गर्न समिति गठन गर्ने सहमति भएको छ । नेपाल रेडक्रस सोसाइटी पाँचथर शाखाका सभापति कृष्णप्रसाद बाँस्कोटाको संयोजकत्वमा अस्पताल विकास समितिका सदस्य दीपक नेपाल, मृतक बालिकाका बावु कमल थाम्सुहाङ र छिमेकी होमराज थाम्सुहाङ सदस्य तथा जिल्ला अस्पतालका मेडिकल रेकर्ड अधिकृत नारायण जोशी सदस्य रहेको छानविन समिति गठन गरिएको हो ।

यस्तै मृतक बालिकाका परिवारका सदस्यलाई उपयुक्त समयमा रोजगारीका लागि प्रयत्न गर्ने, मृतक बालिकाको काजकृयाका लागि रु. ४० हजार रकम अस्पताल विकास समिति र रेडक्रस सोसाइटी शाखाले उपलब्ध गराउने सहमति भएको छ । यस्तै आवश्यक कानूनी प्रकृया पूरा गरी बालिकाको शव अस्पतालबाट उठाई शव परीक्षण गरी अन्तिम संस्कार गर्ने सहमति समेत भएको छ ।

फालेलुङ गाउँपालिका–८ घर भई फिदिम–२ बस्ने कमल थाम्सुहाङकी साढे तीन वर्षीया छोरी कृष्टिनाको उपचारका क्रममा हिँजो विहान निधन भएपछि जिल्ला अस्पताल तनाबग्रस्त बनेको थियो । प्रशासनले अस्पताल क्षेत्रको सुरक्षालाई ध्यान दिई नियन्त्रणमा नलिँदा उत्तेजित भीडले गरेको आगजनीमा अस्पतालका संरचनामा ठूलो क्षति पुगेको छ ।

प्रतिक्रिया दिनुहोस्