साझा चुनौती सामना गर्न सबैसँग सहकार्य गर्छुः प्रधानमन्त्री देउवा



फिदिम । प्रधानमन्त्री शेरबहादुर देउवाले प्रतिनिधिसभामा विश्वासको मत माग्नुभएको छ । प्रतिनिधिसभाको बैठकमा सम्बोधन गर्दै देउवाले राजनीतिक विचार र दलका आधारमा प्रतिस्पर्धा स्वभाविक भएपनि साझा चुनौती सामना गर्न सरकारले सबैसँग सहकार्य गर्ने बताउनुभयो ।

“बहुदलीय व्यवस्थामा फरक राजनीतिक विचार, दल र प्रतिस्पर्धा स्वभाविक हुन् । यी आवश्यक पनि छन् । तर, हाम्रा केही साझा चुनौती , गन्तव्य र उद्देश्य छन् । त्यसका लागि हामीले सहकार्य गर्नैपर्छ । नेपालको संविधानको संरक्षण र यसको कार्यान्वयन हाम्रो साझा गन्तव्य हो”, देउवाले भन्नुभयो ।

पटक–पटकको प्रतिनिधिसभा विघटनको कारण देशमा राजनीतिक अन्योल र अनिश्चितताको अवस्था देखिएको भन्दै प्रधानमन्त्री देउवाले अब जनताका समस्या समाधान गर्न सरकार केन्द्रित हुने बताउनुभयो । निवर्तमान प्रधानमन्त्रीका रूपमा केपी शर्मा ओली नेतृत्वको सरकारले गरेका राम्रा कामलाई आफूले निरन्तरता दिने भन्दै देउवाले अहिलेसम्म गरेका असल कामका लागि ओलीलाई धन्यवादसमेत दिनुभयो ।

कोभिड–१९ को रोकथामका लागि सरकारले सम्पूर्ण प्रयत्न गर्ने भन्दै प्रधानमन्त्री देउवाले सबै राजनीतिक दल र प्रतिनिसिभाबाट सरकारले सहयोगको अपेक्षा राखेको बताउनुभयो ।

प्रतिक्रिया दिनुहोस्