आधिकारिक नेकपा हामी हौँ, सूर्य चिन्ह हामीसँगै रहन्छः नेपाल



पाँचथर, १३ माघ

नेपाल कम्युनिष्ट पार्टी (नेकपा) प्रचण्ड–माधवकुमार नेपाल पक्षका अध्यक्ष माधवकुमार नेपालले आधिकारिक नेकपा आफूहरु रहेको भन्दै चुनाव चिन्ह सूर्य समेत आफूहरुसँगै रहने वताउनुभएको छ ।

उक्त पक्षको पाँचथर जिल्ला कमिटीले आज फिदिममा आयोजना गरेको कार्यकर्ता भेला तथा प्रशिक्षण कार्यक्रमलाई सम्बोधन गर्दै नेपालले निर्वाचन आयोगको निर्णयसँगै नेकपाको आधिकारिकताको प्रश्न टुङ्गिएको वताउनुभएको हो ।

“निर्वाचन आयोगले ४११ केन्द्रीय सदस्यलाई मान्यता दिएपछि त्यसको बहुमतका आधारमा हामी आधिकारिक नेकपा हौँ”, नेपालले भन्नुभयो “सूर्य चिन्ह त्यता रहन्छ जता नेपाल कम्युनिष्ट पार्टी (नेकपा) हुन्छ ।

निर्वाचन आयोगको निर्णयसँगै प्रधानमन्त्री केपी शर्मा ओलीले गरेका सबै नियुक्तिहरु बदर हुने उहाँले दाबी गर्नुभयो । ४४१ जनाको केन्द्रीय कमिटी र ४५ जनाका स्थायी समिति आधिकारिक भएको र त्यसमा आफूहरुसँग बहुमत रहेको नेता नेपालको भनाई थियो ।

४४१ जनाको केन्द्रीय कमिटीले प्रधानमन्त्री ओली र अर्का अध्यक्ष पुष्पकमल दाहाललाई अध्यक्ष चुनेकाले उक्त कमिटीले बहुमतले निर्वाचित ब्यक्तिलाई निस्कासित समेत गर्न सक्ने उहाँको भनाई छ ।

“राज्यका सबै निकायलाई हेक्का हुनुपर्छ, केन्द्रीय कमिटीको वैधानिक बैठकले ओलीलाई अध्यक्षबाट हटाई मलाई चयन गरेको हो”, नेपालले भन्नुभयो, “निर्वाचित गर्न सक्ने पार्टीले निस्कासित गर्न पनि सक्छ । हामीले उहाँलाई निस्कासन गरिसकेका छन् । उहाँ नेकपाको अध्यक्ष हुनुहुन्न । गुटको अध्यक्ष लेखेहुन्छ । नेकपाको नाम लिन पाउनुहुन्न ।”

नेपालले संविधानको कुनै धारामा नटेकी भएकाले प्रतिनिधिसभा विघटन गर्ने मन्त्रीपरिषदको निर्णय भएकाले उक्त निर्णय अवैधानिक भएको र उक्त निर्णय राजपत्रमा विधिसम्मत रुपमा प्रकाशन नभएको दाबी गर्नुभयो ।

सबैको असन्तुष्टि भएपछि प्रधानमन्त्रीले त्यसको कारण खोज्नुपर्ने वताउँदै नेता नेपालले देशका सबै दल प्रधानमन्त्रीका विरुद्ध रहेको र सबैले प्रतिनिधिसभा विघटनलाई असंवैधानिक भनेको दाबी समेत गर्नुभयो । जनताको बहुदलीय जनवाद मदन भण्डारी र आफूले विकास गरेका दाबी गर्दै नेपालले नेकपा बनिसकेपछि पूर्व पार्टी ब्युतन नसक्ने वताउनुभयो ।

नेता नेपालले तत्कालीन नेकपा (एमाले)को महाधिवेशनबाट जाल, झेल, टिकडम गरेर प्रधानमन्त्री ओली अध्यक्ष चुनिएको आरोप समेत लगाउनुभयो । नेकपाका अध्यक्ष पुष्पकमल दाहाललाई प्रधानमन्त्री ओलीले धुरुधुरु रुहाएको भन्दै दाहाल ‘हत्तु हैरान भएको’ दाबी गर्नुभयो ।

प्रधानमन्त्रीले गल्ती स्वीकार गरे पार्टी एकता र सहकार्य जारी हुन सक्ने वताउँदै नेता नेपालले आफू कुनै पदको लोभ नगर्ने र समस्या नबन्ने वताउनुभयो । प्रधानमन्त्री ओली नेतृत्वको समूह चोइटिएर जाने दाबी गर्दै नेता नेपालले ‘भीरबाट लड्ने गोरुलाई काँध हाल्न नसकिने’ भन्दै कटाक्ष गर्नुभयो ।

१५ वर्षसम्म आफूले पार्टीको नेतृत्व गरेको, पार्टी अध्यक्ष पुष्पकमल दाहालसँग ४० वर्षअघिदेखि सहकार्य गरेको वताउँदै नेता नेपालले प्रधानमन्त्री ओलीले दाहाललाई २०६३ सालमा मात्रै देखेको र आफूले भेट गराएको दाबी गर्नुभयो ।

कार्यक्रममा उक्त समूहका स्थायी कमिटी सदस्य एवं पूर्वमन्त्री जनार्दन शर्माले प्रधानमन्त्री ओलीका कारण देशको अग्रगमन र समृद्धिमा बाधा परेको आरोप लगाउनुभयो ।

उहाँले विगतदेखि नै एमाले र माओवादीवीच भएका सहमति र सहकार्यका आधारमा पार्टी एकता भएको वताउनुभयो । उहाँले नयाँ ढङ्गले पार्टी संगठन निर्माण गरिने वताउनुभयो ।

प्रतिक्रिया दिनुहोस्