‘एउटा बद्मास ठेकेदारले बाटो बनाउँदैन्, दोष चाँही प्रधानमन्त्रीको टाउकोमा ?’



पाँचथर, ११ असोज

भौतिक पूर्वाधार तथा यातायात मन्त्री वसन्तकुमार नेम्वाङले विभिन्न निकायबाट हुने कमजोरीमा समेत सरकारलाई दोषी देखाउने कार्य भइरहेको वताउनुभएको छ ।

सरकार प्रत्यक्ष रुपमा नजोडिएका क्षेत्रमा समेत सरकारलाई नै जिम्मेवार देखाई बद्नाम गर्न खोज्ने कार्य भइरहेको मन्त्री नेम्वाङको भनाई छ । जिल्ला समन्वय समिति पाँचथरले शनिवार फिदिममा आयोजना गरेको कार्यक्रमलाई सम्बोधन गर्दै मन्त्री नेम्वाङले भन्नुभयो, “एउटा बद्मास ठेकेदारले बाटो बनाउँदैन्, तर दोष चाँही प्रधानमन्त्रीको टाउकोमा लगाउने ?”

कयौँ विकास आयोजनाहरुमा ठेकेदारले समयमा काम नगर्दा सरकार आलोचित हुनुपरेको भन्दै मन्त्री नेम्वाङले अव सरकारले कसैलाई पनि छुट दिन नसक्ने वताउनुभयो । “प्रधानमन्त्री ज्यूले शिलान्यास गर्नुभएको राँके–रबि–भेडेटार सडकको अहिलेसम्म ३२ प्रतिशत भौतिक प्रगति हुनुपर्नेमा जम्मा सात प्रतिशत मात्रै छ”, नेम्वाङले भन्नुभयो, “ठेकेदारले काम नगर्दा रकम जुटाउने, शिलान्यास गर्ने र जनतालाई सुविधा पु¥याउन खोज्ने प्रधानमन्त्री ज्यूले गाली खानुपर्ने अवस्था अव अन्त्य हुन्छ ।”

समयमा काम सम्पन्न नगर्ने निर्माण ब्यवसायीमाथि कारबाही हुन थालेको वताउँदै मन्त्री नेम्वाङले अव पनि छुट पाइन्छ भन्ने कल्पना पनि नगर्न आग्रह गर्नुभयो । यस्तै जिम्मेवारी पूरा नगर्ने तालुकदार निकाय समेत कारबाहीको भागेदार बन्नुपर्ने उल्लेख गर्दै मन्त्री नेम्वाङले कोभिड–१९ को महामारीका वीच पनि निरन्तर कार्यक्षेत्रमा सक्रिय सरकारी तथा गैरसरकारी निकायलाई धन्यवाद ज्ञापन गर्नुभयो ।

प्रधानमन्त्री र सरकारको सोचअनुसार पूर्व–पश्चिम रेल सञ्चालन गरेरै छोड्ने मन्त्री नेम्वाङको दृढता छ । यसका लागि रेलमार्ग डीपीआरको काम भइरहेको उहाँले जानकारी दिनुभयो । पछिल्लो पटक खरिद गरिएका दुई वटा रेलका विषयमा उठ्ने गरेका प्रश्नहरुको ठट्यौलीमा जवाफ दिँदै उहाँले कागजको टुक्रा नभई मुलुक साँच्चिकैको रेल सञ्चालन गर्ने चरणमा पुगेको वताउनुभयो ।

“साँच्चै रेल ल्यायो, एक दुई दिन त चुप लाग्छन्, फेरी ९३ वर्षअघिको रेल हो नि भन्न थाल्छन्”, मन्त्री नेम्वाङले भन्नुभयो, “यो त कम्प्युटरबाट चल्ने रेल हो भनेर देखायो, यो त २० करोडमा आइहाल्थ्यो नि भनेर आफैँ दाम राख्छन् ।” सरकार ‘एक्सन ओरियन्टेड’ भएको वताउँदै मन्त्री नेम्वाङले जनतालाई सेवा र सुविधा पु¥याउनकै लागि पूर्वाधार निर्माणका विशेष जोड दिइएको वताउनुभयो ।

प्रतिक्रिया दिनुहोस्