पाँचथरमा निर्वाध चलिरहेका सभा, समारोहले बढाउँदैछ सङ्क्रमणको जोखिम



पाँचथर, ५ असोज
यहाँ निर्वाध रुपमा चलिरहेका ठूलो संख्यामा मानिस भेला हुने सभा, समारोहले कोभिड–१९ सङ्क्रमणको जोखिम बढाएको छ ।

बन्दाबन्दी (लकडाउन) खुल्नुका साथै ब्यापार–ब्यवसाय, होटल–रेष्टुराँ, लामो दूरीका सवारीका साधन सञ्चालनमा आएपनि सरकारले सबै प्रकारका सभा, समारोह, भेलामा रोक लगाइरहेकै छ । त्यससम्बन्धी सूचना जिल्ला स्तरमा जिल्ला स्थित प्रशासन तथा स्थानीय तहहरुले नियमित रुपमा जारी गरिरहेकै छन् ।

ठूलो सङ्ख्यामा मानिस भेला हुने कार्यक्रमहरुबाट कोभिड–१९ सङ्क्रमण फैलन खतरा अत्यधिक हुने भन्दै सरकारले सभा, समारोह, भेलामा रोक लगाएको हो । यस्ता अत्यावाश्यक काममा स्वास्थ्य सुरक्षाका मापदण्ड अनिवार्य रुपमा पालना गर्न सरकारी निकायहरुले सुझाइरहेका छन् । तर पाँचथरमा सभा, समारोह, भेला लगायत कार्यक्रम रोकिएका छैनन् भने यस्ता कार्यक्रममा स्वास्थ्य सुरक्षाका मापदण्ड अवलम्बन समेत हुन सकेको छैन् ।

यहाँ राजनीतिक दलका गतिविधिहरु नियमित जस्तै सञ्चालित छन् । पार्टी प्रवेशदेखि भेला बैठकहरु चलिरहेकै छन् । जिल्लाका नेताहरु पार्टीका गतिविधिमा गाउँ–गाउँ पुगिरहेका छन् । दलका नेता कार्यकर्ताहरु कोभिड–१९ सङ्क्रमणको महामारीको पर्वाह नगरी चुनाव नजिकिए जसरी राजनीतिक गतिविधिमा ब्यस्त छन् ।

बधाई, शुभकामना र श्रद्धाञ्जली ब्यक्त गर्ने मुख्य उद्देश्य रहने विभिन्न कार्यक्रमहरुमा समेत आवश्यक पर्नेभन्दा बढी भीड जम्मा भइरहँदा सचेतना र सतर्कता अपनाइएको पाइदैन् ।

राजनीतिकभन्दा गैरराजनीतिक क्षेत्रका गतिविधिहरु झनै बाक्लोगरी भइरहेका छन् । ब्यावसायिक, साँस्कृतिक, सार्वजनिक कार्यक्रम चलिरहेका छन् । यस्ता कार्यक्रममा स्वास्थ्य सुरक्षाका मापदण्डहरु अपनाउने सवाललाई आयोजक र सहभागीहरुले प्राथमिकतामा राखेका छैनन् । लकडाउन खुलेयता ‘कोभिड–१९ सङ्क्रमणको महामारी रोक्ने दायित्व स्थानीय प्रशासन र सरकारको मात्रै हो’ भन्ने सन्देश दिने गतिविधिहरु विभिन्न क्षेत्रबाट भइरहेका छन् ।

कोभिड–१९ को सङ्क्रमण रोकथाम तथा नियन्त्रणका लागि जिल्ला स्तरमा आयोजना गरिने बैठक तथा समीक्षामा सतर्कता अपाउने/अपनाउन लगाउनुपर्छ भन्ने आवाज सशक्त रुपले राख्ने ब्यक्तिहरु नै यदाकता स्वास्थ्य सुरक्षाका मापदण्डहरु ख्याल नगरी विभिन्न कार्यक्रम आयोजना गर्ने तथा सहभागी हुने गरेका देखिन्छन् । ठूलो संख्यामा हुने भेला तथा स्वास्थ्य सुरक्षाका मापदण्डको पालना नभएपनि सुरक्षा निकायले यस्ता गतिविधि रोक्न सकेको छैन् ।

असोज १ गतेदेखि सवारीका साधन सञ्चालनमा आएपछि लामो समयदेखि गाउँ–घर फर्कन नपाएकाहरु काठमाण्डौं तथा तराईका जिल्लाहरुबाट जिल्ला फर्कदैछन् । विशेषत तराईका जिल्लासँगको दैनिक सम्पर्कले यहाँ सङ्क्रमणको जोखिम बढिरहेको छ । जिल्ला भित्रै २० जनाभन्दा बढीमा कोभिड–१९ सङ्क्रमण पुष्टि भइसकेको छ । तर जोखिमको तुलनामा सावधानी र स्वास्थ्य सुरक्षाका मापदण्डको अवलम्बनको अवस्था अत्यन्तै कमजोर हुँदा एकै पटक धेरै ब्यक्तिमा सङ्क्रमण फैलन खतरा बढेको यहाँका स्थानीयवासीको गुनासो छ ।

स्थानीय प्रशासनले ‘प्रत्येक ब्यक्ति सचेत भएमात्रै महामारी नियन्त्रण तथा रोकथाममा सहयोग पुग्ने’ भन्दै थप सचेतना अपनाउन सार्वजनिक सूचनाहरु मार्फत आग्रह गरिरहेको छ । नागरिक स्तरमा पाँचथर उद्योग वाणिज्य संघले उपभोक्ताहरुलाई भौतिक दूरी पालना तथा मास्कको प्रयोग अनिवार्य गर्न सदरमुकाम केन्द्रीत सचेतनामुलक गतिविधि गर्दै आएको छ ।

प्रतिक्रिया दिनुहोस्