नेपालमा कोरोना संक्रमितको संख्या दुई हजार नाघ्यो



फिदिम । नेपालमा मङ्गलवार झण्डै तीन सय जनामा कोरोनाभाइरस सङ्क्रमण पुष्टि भएको छ । योसँगै नेपालमा सङ्क्रमितको कुल संख्या दुई हजार एक सय नाघेको छ । सङ्क्रमितमध्ये आठ जनाको मृत्यु भइसकेको छ ।

मङ्गलवार सङ्क्रमण पुष्टि हुनेमध्ये काठमाण्डूमा कार्यरत चार स्वास्थ्यकर्मी पनि छन् । मन्त्रालयका प्रवक्ता डा. विकास देवकोटाले अपराह्णसम्म विगत २४ घण्टामा २८८ जनामा कोभिड–१९ देखिएको बताएका हुन् ।

मङ्गलवारसम्मको स्थितिमा नेपालको कुल सङ्क्रमण सङ्ख्या दक्षिण एशियाली मुलुकहरू भुटान, माल्दिभ्स र श्रीलङ्कामा भन्दा धेरै भएको छ । भुटानमा ४७ जना, श्रीलङ्कामा १,६४३ जना र माल्दिभ्समा १,८२९ जनामा सङ्क्रमण पुष्टि भएको छ।

भारतमा एक लाख ९९ हजारभन्दा बढीमा सङ्क्रमण देखिएको छ भने पाकिस्तानमा ७६,३९८ जनामा, बांगलादेशमा ४९,५३४ जनामा र अफगानिस्तानमा १६,४९२ जनामा सङ्क्रमण पुष्टि भएको छ ।

सातवटै प्रदेशका कुल ६१ जिल्लामा सङ्क्रमितहरू भेटिएका छन् । अहिले गण्डकी प्रदेशमा थप १० जनामा कोभिड–१९ पुष्टि भएको छ । गण्डकी प्रदेश प्रयोगशालामा गरिएको परीक्षणमा स्याङ्जाका पाँच र पर्वतका पाँच जनामा भाइरसको सङ्क्रमण पुष्टि भएको हो ।

विगत २४ घण्टामा प्रदेश नं २ मा १२० जना व्यक्तिमा कोरोनाभाइरस सङ्क्रमणको पुष्टि भएको त्यहाँको सामाजिक विकास मन्त्रालयले जनाएको छ । रौतहटमा ७४ जना, सर्लाहीमा २१ जना, सिराहामा १७ जना, धनुषामा चार जना, महोत्तरीमा दुई जना, सप्तरी जिल्लामा एक जना र बारा जिल्लामा एक जनामा सङ्क्रमणको पुष्टि भएको हो ।

त्यस्तै कर्णाली प्रदेशको सामाजिक विकास मन्त्रालयका अनुसार विगत २४ घण्टामा त्यहाँ ६४ जनामा कोभिड–१९ भएको पुष्टि भएको छ । तीमध्ये सुर्खेतमा २७ जना, दैलेखमा नौ जना, सल्यानमा १८ जना र अछाममा १० जना रहेको बताइएको छ । सङ्क्रमितहरू विभिन्न उमेर समूहका भए पनि अधिकांश युवा र पुरुष छन् ।

मन्त्रालतका अनुसार थप ४५ जना कोरोनाभाइरसमुक्त भएर अस्पतालबाट बिदा भएका छन् । यससँगै निको हुनेको संख्या २६६ पुगेको छ । मन्त्रालयको तथ्याङ्कअनुसार विगत २४ घण्टामा पीसीआर विधिबाट ३,४४० वटा परीक्षण गरिएको थियो ।

अहिले देशभरि १,४५,३७५ जनालाई क्वारन्टीनमा राखिएको छ । तीमध्ये अधिकांश भारतबाट फर्किएका व्यक्ति भएको मन्त्रालयका प्रवक्ता डा. विकास देवकोटाले बताए । (बीबीसी नेपालीाट)

प्रतिक्रिया दिनुहोस्