फिदिम, १६
सत्तारुढ नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले कोरोना भाइरसको सङ्क्रमणसँग जुधिरहेको नेपाललाई सहयोग गर्न अपील गर्दै चिनियाँ राष्ट्रपति सी चिनफिङलाई पत्र पठाउनुभएको छ ।
तीन दिनअघि पठाइएको पत्रमा उहाँले कोरोना महामारी नियन्त्रण गर्न सफल भएकोमा राष्ट्रपति सीलाई बधाई समेत दिनुभएको छ ।
‘चीनले कोरोना सङ्क्रमणलाई सफलतापूर्वक नियन्त्रण गरेको मैले मिडियाहरुका समाचारबाट थाहा पाएको छु”, अध्यक्ष प्रचण्डले पत्रमा भन्नुभएको छ, “कोरोना भाइरससँगको यो लडाइँमा जित हात पारेकोमा म नेकपाका तर्फबाट बधाइ दिन चाहन्छु ।”
अध्यक्ष प्रचण्डकी स्वकीय सचिव गंगा दाहालले अध्यक्ष प्रचण्डले तीन दिनअघि पत्र पठाएको वताउनुभयो । मार्च २६ को मिति राखिएको पत्र चिनियाँ दूतावासमार्फत् पठाइएको भने होइन ।
पत्रमा अध्यक्ष प्रचण्डले नेपाल अहिले यो महामारीसँग जुधिरहेको उल्लेख गर्दै सहयोगका लागि राष्ट्रपति सीलाई गर्नुभएको छ । नेपाल यो महामारीसँग जुध्नका लागि तयार अवस्थामा नरहेको भन्दै उहाँले खासगरी औषधि र अन्य मेडिकल सामग्री सहयोग गर्न आग्रह गर्नुभएको छ । उहाँले नेपाली जनता र नेकपाका तर्फबाट जतिसक्दो छिटो सहयोग गर्न पनि अपील गर्नुभएको छ । (इकान्तिपुरबाट)
